UTOAJI WA MIKOPO KWA MWAKA WA FEDHA 2020/2021

Tarehe ya kuwekwa: July 4th, 2021

UTOAJI WA MIKOPO KWA MWAKA WA FEDHA 2020/2021

Mifuko ya Maendeleo ya Wanawake, Vijana na Walemavu ilianzishwa kwa ajili ya kutoa Mikopo yenye masharti nafuu kwa makundi ya Wanawake, Vijana na Watu wenye Ulemavu. Mifuko hii  inaendeshwa chini ya Kanuni za Utoaji na Usimamizi wa Mikopo kwa Vikundi vya Wanawake, Vijana na Watu wenye ulemavu za mwaka 2019; kanuni hizi zimetungwa kwa lengo la kutekeleza sheria ya Fedha ya Serikali za Mitaa sura Na. 20 chini ya Kifungu cha 37A (4).

Chini ya Kanuni hizo, Mamlaka za Serikali za Mitaa (Halmashauri) inakuwa na wajibu wa kutenga asilimia kumi ya mapato yanayokusanywa kutoka kwenye vyanzo vya ndani vya mapato kwa ajili ya kutoa mikopo kwa vikundi vilivyosajiliwa vya wanawake, vijana na watu wenye ulemavu. Kiasi hicho kilichotengwa hutolewa kwa Vikundi Vya Wanawake, Vijana na Watu Wenye Ulemavu kwa vigezo vilivyoainishwa katika kanuni hizo.

Utoaji wa mikopo kwa mwaka wa fedha 2020/2021

Kwa mwaka wa fedha 2020/2021 Halmashari ilitenga jumla ya shilingi 241,000,000 kama sehemu ya asilimia 10 ya mapato ya ndani ya Halmashauri fedha hiyo ilipangwa kutolewa kwenye vikundi 60 vya wanawake, Vijana na watu wenye ulemavu .

Kwa kipindi cha Julai 2020 hadi  30 Juni,  2021 Jumla ya vikundi 24 vyenye wanachama 217 vinapewa mikopo yenye thamani ya shilingi 114,000,000; kati ya vikundi  hivyo  Vikundi 12 ni vya wanawake ambao idadi  yao ni 148, vikundi 8  ni vya vijana ambao wako 69 na vikundi 4 ni vya walemavu.

Kiasi hiki cha mikopo  ya shilingi milioni 117,000,000 kinafanya jumla ya mikopo iliyotolewa kwa mwaka huu wa fedha kuwa shilingi milioni 152,000,000 ikiwa na pamoja na mikopo ya shilingi milioni 35,000,000 iliyotolewa kwa vikundi 8 katika robo ya tatu ya mwaka huu (2020/2021)

Ufuatiliaji wa marejesho kwa mwaka 2020/2021

Kwa mwaka wafedha 2019/2020  Halmashauri ilikopesha jumla ya shilingi 175,000,000 kwenye vikundi 40 vya wanawake, vijana, na watu wenye ulemavu,  hadi kufikia  30 Juni 2021 katika fedha hizo  Shilingi  98,500,000 zimerejeshwa kutoka vikundi 40 vilivyokopeshwa. Aidha marejesho yanaendelea  kukusanywa kwani vikundi vingi bado viko ndani ya muda wa mkataba. 

Changamoto

Bado kuna Baadhi ya Vikundi havirejeshi  fedha za mikopo kwa wakati kulingana na mikataba; hii inasababisha kuchelewa kutoa mikopo kwa wahitaji wengine. Ili kukabiliana na changamoto hii, tutaendelea kufanya yafuatayo:-

• Kutoa elimu ya ujasiliamali kwenye vikundi vyote vya wajasiliamali vinavyopewa mikopo.
• Tunaendelea kufanya ufuatiliaji wa marejesho ili vikundi kuweza kurejesha mikopo kwa wakati.
• Elimu ya uundaji na uendeshaji wa vikundi inaendelea kutolewa
• Tunaendelea kushirikiana na wadau wengine ikiwemo Ofisi ya OCD kufuatilia madeni sugu.

Mkakati kwa 2021/2022

Kwa mwaka wa fedha 2021/2022 Halmashari imejiwekea mikakati  ya kuhakikisha kuwa inaongeza ukusanyaji wake wa mapato ya ndani na utoaji wa mikopo  kwa wingi kwa wanawake, vijana na watu wenye ulemavu kwa kufanya yafuatayo :-

• Kufanya mikutano na kundi la Watu Wenye Ulemavu ili wahamasike kujiunga katika vikundi na kuanzisha shughuli za ujasiliamali na kuzifikia huduma za Mfuko wa Mikopo wa Walemavu
• Kufanya mafunzo elekezi kwa vijana wenye ujuzi wa ufundi Mchundo  ukiwemo wa uashi, uselemala, kufyatua matofali kwa kutumia saruji, umeme, n.k. ili waweze kuunda vikundi vya uzalishaji mali. Vikundi hivyo vitaunganishwa na huduma zinazotolewa na Mfuko wa Maendeleo ya Makundi ya Wanawake, Vijana na watu wenye ulemavu
• Kubaini wabunifu wa shughuli mbali mbali za ufundi na biashara mbali mbali katika makundi haya ya Vijana, Walemavu na Wanawake ili kuwaunganisha na huduma za kifedha
• Kufanya ufuatiliaji wa urejeshaji wa Mikopo na kuendelea kujenga uwezo kwa vikundi